Nafarroako I Argitalpen Azoka

Iruñeko autobus-geltoki ohiak hartuko du azaroaren 15etik 19ra bitartean liburu, disko eta beste euskarri batzuen Argitalpen Azoka. Txalaparta hainbat berritasunekin eta 1.000 izenburutik gorako argitalpen-funts osoarekin joango da. 11., 12. eta 13. txarteldegietan aurkituko gaituzu.

Ezaugarri horiek biltzen zituen ekitaldi bat antolatzea sektorearen aspaldiko aldarrikapena zen. Hala, Nafarroak lehen aldiz izango du azoka bat liburu-argitaletxeen, disko-etxeen, eguneroko eta aldizkako prentsa-argitaratzaileen, tokiko aldizkarien edo Nafarroako Gobernuaren argitalpenak erakusteko. Azken batean, Nafarroako argitalpenen aberastasunaren panoramika bat eskaintzea da kontua, enpresa handietatik hasi eta autoedizioko proiektuetaraino.

Nafarroako Argitalpenen I. Azoka 948 Merkatua, Mercado de las Artes de Navarra deiturikoaren barruan sartzen da, zinema eta ikus-entzunezkoak, arte eszenikoak (antzerkia, dantza, zirkua…), musika, arte plastikoak eta ikusmenezkoak eta sorkuntza- eta kultura-arloko beste industria batzuk (prototipo artistikoak, moda, diseinua, arkitektura eta lanbide berriak) hartuko dituen azoken azokan.

Ia 1.000 izenburu gure standean

Txalapartak lehen aldiz parte hartu ahal izango du liburu-azoka batean Nafarroan. Eta lehen aldiz izango dugu ekitaldi batera gure argitalpen-funts osoarekin joateko aukera. Autobus-geltoki ohiko 11., 12. eta 13. txarteldegiek hartuko dute gure liburu-denda, hainbat ataletan banatuta egongo dena: Nobela, Saiakera, Ikerketa, Nafarroa, Euskal politika, Langile-mugimendua, Emakumea eta feminismoa, Askapen-mugimenduak, Beste mundu bat posible da, Anarkismoa, Gorputza eta gogamena, Erotismoa eta Haurren atala (Txiki txoko).

Gainera, berritasunez beteta joango gara hitzordura:

• ‘Gu orduko hauek’ Garazi Arrularen (Tafalla, 1987) lehen liburua da. Gizakien arteko distantziari, inkomunikazioari eta abarri buruz hitz egiten diguten euskarazko zortzi kontakizun labur dira… Fantasia? Errealitatea? “Errealitatea ederra da” dio egileak. Lan horrekin kolore berriak gehitzen dizkio euskal literaturari.

• ‘Consejo de guerra’ da 1936ko kolpearen ondoren Nafarroako errepresioaren koadroa osatzeko falta zen pieza: artxibo militarrak. Datuen dokumentu-izaera kontuan hartuta, alderdi fidagarrienetako bat da, testuinguruan eta lerro artean kokatutako irakurketa behar duten arren. Ricardo Urrizolak hainbat urte eman ditu Nafarroako Komandantzia Militarreko Artxiboaren edukia husten -lehen aldiz- eta, neurri txikiagoan, Bartzelonako Pirinioetako Tarteko Artxibo Militarrean eta Ferroleko Ipar-mendebaldeko Tarteko Artxibo Militarrean Nafarroari buruz bildutakoa husten. Emaitza liburu ikusgarria izan da, 2000tik gora erreferentzia onomastiko dituena. Guardia Zibilak, Falangearen eta Erreketeen tokiko buruek erabilitako errepresioaz gain, ezkerreko errepublikanoen, abertzaleen eta erregimen berriaren disidente guztien aurka Nafarroan erabilitako basakeriaren alderdi  “legalista” erakusten digu.

• ‘Memorias de la calle’. Herri-jakinduriak dioen bezala, egia bada irudi batek mila hitzek baino gehiago balio duela, liburu horrek milioika istorio ditu, hain zuzen ere, Joxe Lacallek argazkigintzako lan eta grinaz betetako lau hamarkadatan jaso dituenak.  Eta hori gutxi balitz, luxuzko hainbat gonbidatuk ­Sagrario Aleman, Floren Aoiz, Martxelo Díaz, Edurne Elizondo, Jose Mari Esparza, Reyes Ilintxeta, Juan Kruz Lakasta, Natxo Matxin, Jabier Salutregi, Benito Uterga, Julio Villanueva, Pili Yoldi eta Patxi Zamora­ hitzekin uztartu dituzte haren argazkiak, haiek jaso nahi izan zutena testuinguruan jarriz: errepresioa, borrokak, ekintza politikoak, mobilizazioak, aurre egiteko modu irudimentsuak... Eta, horiekin batera, gatazkaren unerik gogorrenetan ere kantatzeko eta dantzan eta barrez aritzeko gai zen herri baten poza, indarra eta adorea.

Berritasun gehiago gaztelaniaz:

• ‘Breve historia de ETA’, Iñaki Egaña.

• ‘La izquierda abertzale acertó’, Raul Zelik.

• ‘Memorias del calabozo’, Mauricio Rosencof, Eleuterio Fernández Huidobro

• ‘A descolonizar las metodologías. Investigación y pueblos indígenas’, Linda Tuhiwai Smith.

• ‘Diez días que estremecieron al mundo’, John Reed.      

• ‘Historia de la Revolución rusa’, León Trotsky.

Berritasun gehiago euskaraz:

• ‘ETAren historia laburra’, Iñaki Egaña.

• ‘Umezurtzen aberria’, Julen Kaltzada.

• ‘Sorgina kirris-karras’, Tina Meroto & Maurizio A. C. Quarello.

• ‘Txokolata’, Marisa Núñez & Helga Bansch.

Aurkezpenak

Azokak irauten duen bitartean, hainbat aurkezpen egingo dira Geltokiko kafetegian:

• ‘Memorias de la calle’ liburuaren aurkezpena, Joxe Lacalle egilearekin. Azaroak 17, ostirala, 18.00etan.

• ‘Consejo de guerra’ liburuaren aurkezpena, Ricardo Urrizola egilearekin. Azaroak 18, larunbata, 11.00etan.

Ordutegiak

Azokaren inaugurazioa azaroaren 15ean izango da, 17:00etan Geltokian. Irekiera-ordutegia hauxe izango da: azaroaren 15ean 17:00etatik 21:00etara; eta azaroak 16, ostegunetik azaroak 19, igandera 10:00etatik 14:00etara eta 16:00etatik 21:00etara.