Memoria, oraina eta geroa

Urrian argitaratu zen Apología. Memorias de un editor rojo-separatista, eta honezkero hirugarren edizioa kalean da. Liburuan, Esparzak ibilbide editorial eta politikoaren kronika egiten du, eta kronika hori aldi berean da Tafallan, Euskal Herrian eta munduan egin diren azken lau hamarkadetako borrokaren kontaketa bat. Horrela, autobiografia bat edo Txalapartaren historia liburua izateaz harago, kultur erresistentziaren lekukotza bat da, ideien aldeko gudu bat gehiago, egungo editorearen ofizioari buruzko hausnarketa bat eta pentsamenduaren, ekintzaren eta edizio independentearen apologia bat.

Gure herriaren historia hurbilean egindako ibilbidean, Jose Mari Esparzak behin baino gehiagotan egin du topo Arnaldo Otegirekin, liburuko zenbait pasartek erakusten dutenez. Eta ez da gutxiagorako, Otegiren lidergoak karisma handia eta paper funtsezkoa izan baitu egoera politiko berrian.

Kidetasun politiko eta editorial horretatik sorturiko harremana mintzagai izanen dute datorren otsailaren 8an, Jon Jimenez Txalapartako editorea lagun dutela. Eta, nola ez, Arnaldo gurekin denez, gaurkotasunezko gaiei buruz galdetzeko ere tartea egonen da, etorkizun hurbil ditugun udal- eta foru-hauteskundeak eta Nafarroaren geroa ardatz hartuta.

Ekitaldia otsailaren 8an izanen da, ostiralarekin, arratsaldeko 7etan, Tafallako kultur etxean.